سيادة الرئيس ارجع لنا

سيادة الرئيس ...

ارجعلنا..مش انت واحد مننا ؟؟ـ

و عمرك في يوم ما سرقتنا..

ولا خدت مليم مننا ..

ما تيجي طب ترجعلنا..

تقعد بأهلك وسطنا..

أهو مرة تاكل أكلنا ..

وتلبس يا خويا من لبسنا ..

وتعيش في حارة او في شارع زينا..

قلت ايه ؟؟

يا حارق دمنا..

اااااه @ سيادة الرئيس ...

ارجعلنا..

وغداك يا سيدي عندي أنا..

رز و بطاطس مسرطنة..

لحمة ؟؟

مفيش من سنة.

.فاكهة ؟؟

تعيش انت و أنا ..

و الشاي ..

بآخر معلقة م السكر اللي كان عندنا ..

اشرب و فوق وركز معايا ..

علشان نكملك الحكاية

@ سيادة الرئيس ...

ارجعلنا..

مش سبت الحكم لأجلنا ؟؟

ما تيجي تسمع حكمنا !!

أفكرك ؟؟

ولا انت فاكر زينا ..

قطر اتحرق من كام سنة ..

وغازنا اللي طار من أرضنا ...

و فجأه راح لعدونا..

وعبارة مللي بيغرقوا !!

غرقت في عرض البحر و راحوا أهلنا ..

و الجاني فلسع مننا..

ومركبة بأحلى شباب ...

ييجوا من ايطاليا غرقانين ..

والقرش ياكل لحمنا ..

والله كانوا زينا..

ويمكن أحسن مننا ..

ليهم بيوت و ولاد وعيشة و حلم زي حلمنا..

اتغربوا و اتبهدلوا ..

لما الفساد طال كل حاجة في أرضنا ..

واللي ما ماتش ..

قاعد في هناك غربته ..

والغريب بيذلنا ..

اقولك كمان ؟؟

ولا كفاية ..

ما هو انت عارف كل حاجه عننا ..

أصبر هتسمع حكمنا

@ سيادة الرئيس ...

ارجعلنا ..

ولو انت واحد مننا..

فعلا يهمك أمرنا..

بينا عالنائب العام ..

تقولة على ولاد الحرام ...

اللي مصوا بلدنا و دمنا ..

و افتن دي فتنة مهيش حرام ..

ده حقنا ..

دا لو انت واحد مننا ..

أصبر هتسمع حكمنا

@ سيادة الرئيس ...

ارجعلنا..

اقعد معانا و زينا هعرفك بناسنا وأهلنا ..

دي (أم خالد) أمنا ..

ودول أهل (سالي) أهلنا ..

و(عمر بن بنونة ) إبننا ..

فسر و احكي و قللهم ..

و قللنا ..

واستسمح الروح اللي منورة في الجنة عند ربنا ..

هتقول مكنش قصدنا ؟؟

دول ماتوا غصب عننا ؟؟

كداب و فاجر ..

و اللي يصدقك زيك ..

والكدب ريحته منتنة ..

تتشل إيد اللي ضرب ..

و اللي أمر..

و عليكوا لعنة ربنا ..

أصبر هتسمع حكما

@ سيادة الرئيس ...

ارجعلنا..

أيوه بقول ارجع لنا ..

ياللي سرقت حلمنا ..

وغربتنا و نهبتنا ...

و في كل حتة أهنتنا..

إحنا اللي سال دمنا..

في الإسماعيلية وبورسعيد و الأربعين و التحرير يشهدلنا..

آدي القفص ...

أقف هنا ..

والشعب يحكم ..

مش أنا..

ومش بحكم الظلمة ..

ده بحكم ربنا..

كلمة وقالوها من يجي مائة سنه..

العين بالعين والسن بالسن ...

و هو دا بقه حكمنا ...

و مفيش غيره عندنا .........

وعجبيييييييي

» الرئيس اليمنى: مصرون على المبادرة الخليجية
» ‫نطالب بعودة الرئيس السابق حسني مبارك مرة أخري (منقول)
» محامى يفجر المفاجاه يؤكد وفاه الرئيس السابق مبارك من سنه 2004 ويقدم ادله على وفاته
» التوك شو.. جودت الملط: دخلى الشهرى يعادل راتب 10 "فرّاشين" بالجهاز المركزى.. ومحامى مبارك: فتحى سرور لا يصلح للدفاع عن الرئيس السابق.. ومنير: "أمن الدولة" يتحرك وسط الناس مرتدياً العباءة الدينية